VULEMU LA SICILIA LÌBBIRA E ‘NNIPINNENTI

Sicilianu
 →←
Talianu

di Antoniu Canepa

Picchì li siciliani vonnu èssiri ‘nnipinnenti?
“Picchì la raggiuni e la storia nni ‘nzìgnanu ca accussì hannu a èssiri e ca accussì foru pi sèculi e sèculi.
Comu pi liggi d’omu e di Diu, nuddu cristianu pò liggittimamenti èssiri schiavu di n’àutru (e mancu pò pruspirari mai ntô casu cci addivintassi) accussì nudda nazzioni pò èssiri serva di n’àutra; e, siddu lu fussi, vinissi avviluta, cuvirnata senza justìzzia e nudda umanitati, caricata di dazî pi lu guadagnu nun so’, ma di li soi patruni,  mannata a la ruvina di li liggi fatti pi ssu mutivu, comu cunsiquenza fussi sempri pòvira, ‘gnuranti e disprizziata.
Ma comu addimustrati ca la Sicilia pò aviri n’urigginalità sò particulari?
Diu cci stinnìu d’ogni latata li mari pi èssiri spartuta di ogniduna àutra terra e addifinnìrila di li soi nimichi. La fici accussì granni di supirfici, timpirata di clima, ficunna di solu, p’abbastari nun sulu a la vita di chiossai di tanti miliuna d’òmini,  ma macari a li còmudi, a lu lussu, a ogni gudimentu, a ogni ‘nnùstria, a ogni cummerciu.
Ma cchi cci diciti a chiddi c’arrispùnninu ca, datusi ca canciànu li circustanzi pulìtichi di l’Europa, pi la fusioni di li nichi nti li granni Stati, la Sicilia nun cci la facissi a sustinìrisi cu li so’ suli forzi?
‘N prìmisi s’ha’ cunziddirari ca la Sicilia, pi la so’ grannizza e pi la natura muntuùsa di lu tirritòriu e pi la firezza di l’abbitanti, nun è n’ìsula fàcili di cunquistari.
Secunnu: è un fattu, ‘n pulìtica, ca li Stati nichi si mantènunu pi la gilusìa ricìpruca di li granni, nuddu di li quali pirmittissi a n’àutru d’addivintari cchiù granni cu la cunquista a dannu di Stati cchiù picciriddi. Siddu nun fussi accuddì nun ci fussi la lìbbira Svizzira ca havi cchiù picca di dui miliuna di abbitanti;  nun ci fussi mancu la lìbbira Grecia ca nn’havi nu sulu  miliuni: mentri ca la Sicilia nn’havi chiossai di dui miliuna! Siddu la pirfizzioni pulitica di nu Statu cunsistissi nti la so’  grannizza, la Russia e la Cina fùssiru li Stati cchiù filici di tuttu lu munnu!.
Accussì scriveva, cchiossai di cent’anni fa, Micheli Amari
Oi, sti  palori sunnu veri dui voti . Aoggi la Sicilia havi quattru miliuna di abbitanti,  pronti e dicisi a vinnicari l’antichi e li novi affisi, pronti e dicisi a cunquistari la ‘nnipennenza di l’Italia.
Nun si pò cchiù cuntinuaru comu pô passatu.  Pi nuàutri siciliani, è quistioni di vita o di morti. Spartìrini o mòriri!
Sonnino, ca nun era siparatista e mancu sicilianu, ma ca sparti fu tanti voti Ministru e dui voti Prisidenti di lu Cunsigghiu dû Regnu di l’Italia, scrivìu chisti sacrusanti palori:
“Zoccu attruvamu ntô 1860 c’è ancora.  La Sicilia si fussi lassata a idda stissa attruvassi lu rimèdiu: lu’addimòstranu tanti fatti spicìfichi; e nni l’assicùranu la ‘nt’lliggenza e l’enirgìa di al  sò pupulazzioni e la grannissima ricchizza di li  soi risursi. Ma nuatri taliani di l’àutri pruvinci cci mintemu ‘mpidimenti;  ligalizzamu l’upprissioni esistenti; e prutiggemu l’upprissioni!”
Siddu  Sonnino putìa scrìviri chissu, quantu cchiù tirrìbbile e amara è la viritati! Nuatri siciliani ham’a statu cunziddirati sempri comu si fùssimu feccia di l’umanitati, boni sulu a pulizziari li stivali di li signori vinuti dû cuntinenti!
E nun  criditi ca dumani, cu un riggimi cchiù megghiu , cchiù libbirali, cchiù umanu, si ponnu sistimari li nostri guai! Crìdiri chistu fussi un grannìssimu sbàgghiu.
Nnanzituttu, nuddu cuvernu, pi quantu ginirusu putti èssiri,  nni torna mai (siddu nun fussi custringiutu cu la forza) chiddu ca nni fu arrubbatu nti uttant’anni. E si macari nn’avissi la ‘ntinzioni,  vinissi scacciatu di li stissi taliani prima ancora ca facissi st’attu di justìzzia e di ripirazzioni.
C’è di diri macari ca lu non sapìrisi  sèntiri  la Sicilia e lu cuntinenti non veni sulu di la cattiva vuluntati di l’òmini.  Ni veni di la situazzioni,  di comu foru junciuti riggioni ca avìanu aristari spartuti. Ni veni di li ‘ntiressi cuntrastanti.
La nnùstria siciliana cci criassi dannu a chidda cuntinintali: chistu è sicuru. Lu nostru sviluppu cci purtassi svantaggiu a li nostri sfruttaturi.
Pi chissu la Sicilia nun pò ne ora e ne mai vìviri d’accordu cû  cuntinenti talianu.
Sulamenti li ngènui ponnu aviri spiranza nti n’avviniri cchiù megghiu,  macari cuntinuannnu a stari junciuti cu  l’Italia. E s’allùdunu ca forsi quarchi sicilianu putissi  iri a lu cuvernu taliano…
Pazzi chi siti ! Quanti voti li siciliani hannu statu  ô cuvernu, di Crispi a Orlando, chi beni nn’appi  mai la Sicilia?
Giuseppi Santoro, ntô vulumi supra minziunatu a cura di Castelnuovo, scrissi chisti giusti palori: “La circustanza cchiù gravi è ca la Sicilia trascurata chiossai di li stitti soi figghi ca arrivaru a li cchiù àuti posti dû puteri e dû sapiri”.
Picchi? – m’addumannati. Ma pi na raggiuni chiarissima!
Lu cuntinentu è assai cchiù forti di la Sicilia. Pirciò lu cuvernu veni numinatu o mannatu â casa dû cuntinenti. Ora, cumu putiti mmagginari ca lu cuntinenti chiami a lu cuvernu unu ca metti  la Sicilia avanti a lu cuntinenti?
di “La Sicilia ai Siciliani!” 1944, firmatu cu lu peccu di “Mario Turri”
Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...

%d blogger hanno fatto clic su Mi Piace per questo: